Inte prime metât dal 2023 in Friûl-Vignesie Julie al è lât indevant il ralentament de cressite economiche, scomençât intal 2022; l’indicadôr trimestrâl de economie regjonâl, elaborât de Bancje di Italie, al è lât sù dal 0,9% a pet dal stes periodi dal an di prime, in linie cul andament dal Pil talian (+1,1% intal prin semestri inte medie taliane). Al è ce che al salte fûr dal inzornament su la economie dal F-Vj, presentât vuê inte sede di Triest de Bancje di Italie.
La cressite in regjon, e osserve la istituzion, si è concentrade intal prin trimestri par dopo anulâsi intal secont; i servizis e lis costruzions a son lâts indevant a furnî un contribût positîf che si è oponût l’andament negatîf de industrie in sens strent. Daûr de investigazion conzunturâl, la produzion industriâl si è contrate dal 6,8% a presits costants a pet dal prin semestri 2022 e lis venditis a son caladis simpri in tiermins reâi dal 4,2%, in misure plui acentuade intal marcjât interni a pet di chel forest.
L’andament negatîf al è stât vuidât dal compart dal len e furniment e de metalurgjie, compensât in maniere parziâl de cressite de mecaniche. I invistiments si son cuietâts, frenâts ancje dal aument dal cost dal credit. Lis spietis di tiermin curt formuladis des impresis industriâls al principi de Sierade a prefigurin une stabilitât sostanziâl de ativitât economiche; i plans di invistiment pal 2024 a restin impuestâts ae cautele. (a.d.g.) – 13.11.2023
