Ai 6 di Avrîl a Sacîl, là che e je stade promulgade la Costituzion de Patrie dal Friûl, si celebraran i 948 agns de costituzion dal Stât patriarcjâl furlan, fondât ai 3 di Avrîl dal 1077, cu la edizion numar 48 de Fieste de Patrie dal Friûl. La cerimonie religjose e chê civîl, inmaneadis dal Comun di Sacîl, de Regjon e de ARLeF – Agjenzie regjonâl pe lenghe furlane, in colaborazion cul Istitût Ladin Furlan “Pre Checo Placerean”, si davuelzin a Sacîl parcè che ai 8 di Novembar dal 1366 il patriarcje Marquart di Randeck al veve sielzût propit la citât dal Friûl Ocidentâl par promulgâ lis “Constitutiones Patriae Fori Iulii”, ven a stâi il codiç dal dirit furlan, restât in vore fin al 1797. Lis celebrazions a tacaran in Place Sant’Odorico, denant de Glesie di Sant Uldarì, aes 9.30. I partecipants si cjataran li e, aes 9.45, si fasarà il tradizionâl alcebandiere de bandiere dal Friûl, cul acompagnament dal Grup dai Alpins di Sacîl e dal Istituto Filarmonico Città di Sacile. Po dopo, aes 10, al sarà il moment de Messe, celebrade dai rapresentants des trê diocesis dal Friûl, cun leturis e preieris par furlan, sloven, todesc e venit. Cui che al vûl stâ daûr al event di cjase, al podarà fâlu cjalant il speciâl “Fieste de Patrie”, in onde su Telefriuli (canâl 11), che des 9.45 al trasmetarà in direte sedi la liturgjie, sedi la cerimonie civîl. Come simpri, in ocasion de Fieste e je in program une schirie di events colaterâi in dut il teritori furlan: spetacui teatrâi, events musicâi, presentazion di libris, laboratoris pai plui piçui e tant altri. Il calendari dai events tal teritori si pues consultâ tal sît www.arlef.it. (A.I.) – 01.04.2025
35
