A son stâts cjapâts in graciis de segnalazion fate di une siore indenant cui agns i doi fraudadôrs che a Tresesin, martars ai 22 di Otubar, fasint finte di jessi carabinîrs, a vevin puartât vie a une femine di 80 agns zoiis e bêçs.
I doi fraudadôrs, un om polac che al è a stâ a Caserta e une femine di Napoli, ducj i doi di 29 agns, si jerin presentâts a cjase de siore disint che un so parint al jere stât cjapât intun incident stradâl une vore grivi e che a ocorevin bêçs par judâlu. Subite dopo i doi delincuents a jerin scjampâts, ma la siore e à subite suspietât la fraude e e à rivât di un barcon di cjase a lei la targhe e a viodi il model de auto dai doi, visant daurman i carabinîrs.
I fraudadôrs a son stâts fermâts îr sore sere a San Donà di Piave, daspò di un lunc pedinament; dentri de lôr auto i carabinîrs a àn cjatât dute la robe puartade vie ae siore di Tresesin e a son stâts denunziâts par fraude ingriviade. La robe puartade vie e je stade daurman tornade indaûr ae femine. (a.d.g.) – 24.10.2024
