“O soi compagn di un furlan: o ai cetantis culturis dentri di me. Ve parcè che o soi vignût a Udin: e jere une sielte logjiche”. A son stadis lis peraulis di Kosta Runjaic, todesc nassût a Viene ma di famee de Jugoslavie, dulà che al à passât i prins agns de sô vite. Il gnûf alenadôr dal Udin sielt de famee Pozzo – il cuarantesim cuart, se o vin fat ben i conts – nol rapresente une sielte ‘scontade’. Al ven dal balon european, al fevele dome par inglês cui zuiadôrs, al promet un grum di lavôr e un stîl ricognossibil: une scuadre agressive, che e tegni tant la bale e e fasedi zûc. “O sai di jessi un alenadôr discognossût in Italie”, al à dit dilunc de presentazion uficiâl, “ma o stin creant alc di gnûf, lant intune gnove direzion. O vuei mostrâ un balon che al plasedi ae int, parcè che la nostalgjie pal passât no jude a fâ risultât”. Dongje di lui, doi assistents che lu àn judât intal campionât polac, dulà che al à fat bogns risultâts. E ancje un rinovament totâl dai dirigjents: il diretôr tecnic Gian Luca Nani al lavorarà pal grup, ven a stâi ancje pal Watford, intant che l’ex centricjampist blanc e neri Gokhan Inler (che al à tacât disint: “mandi a ducj, o soi tornât) al lavorarà cu la scuadre par fâ capî ai zuiadôrs che Udin al à di jessi un travuart. (A.I.) – 18.06.2024
106