Inte ex provincie di Udin ogni cuatri dîs e sparìs une persone. Di fat, intal cors dal 2021 e je stade denunziade la sparizion di 73 personis, 79 di Zenâr a metât Novembar di chest an.
Inte metât dai câs a sparî a son minôrs forescj no acompagnâts, pal 22% altris minôrs, pal 26% grancj (il 6% dal totâl al à plui di 65 agns), dutis personis che, in maniere volontarie o cence volê, si son slontanadis di cjase o dal lûc dulà che si cjatavin e, pes circostancis là che al è sucedût il fat, si riten che a puedin jessi in pericul di vite.
Lis denunziis di sparizion a cressin. Lis personis a tornin a comparî intal 42% dai câs. Ve ca parcè che al è impuartant vê un plan che al fronti chest fenomen fasint colaborâ miôr i subiets coinvolts intes ricercjis e simpri plui al pas cu lis gnovis tecnologjiis e risorsis (elicotars, drons, georadar, unitâts cinofilis, data-base internazionâi, media sociâl, logâts web specializâts, …).
Par chest, vuê il Prefet di Udin Massimo Marchesiello al à fat bon il gnûf plan provinciâl pe ricercje des personis sparidis, inzornant la version dal 2014, ancje su la fonde des gnovis liniis vuide dal Comissari straordenari di Guvier pes personis sparidis, e ancje zovantsi des esperiencis fin chi madressudis. (ADG) – 18.11.2022
