L’aur furlan a Parîs al è dopli

Aur, in cjase des aversariis, cun grant patiment e soredut furlan! Inte stesse zornade là che lis “fadis” de gjinastiche artistiche a àn concuistât un storic secont puest tal palaç dal sport di Bercy, lis nazionâls talianis de spade a àn vinçût in cjase de France inte finâl de competizion a scuadris par 30 a 29. Propit tal ultin, intal minût suplementâr. A son stadis decisivis lis prestazions des furlanis Giulia Rizzi e Mara Navarria: titulâr la prime, la seconde invezit jentrade tal puest di Rossella Fiamingo. Par jê, l’aur olimpic al rive di esordiente a 35 agns. Daspò de delusion inte prove individuâl, e je stade grande protagoniste ai cuarts cuintri l’Egjit e in semifinâl cuintri la Cine, in plui che inte prove finâl cuintri la France. Mara, bronç a scuadris a Tokyo e rivade ae sô tierce olimpiade, e partive di risierve, ma a 39 agns si è fate cjatâ pronte e al penultin assalt e à ribaltât la situazion. (A.I.) – 31.07.2024