Nuie di fâ pe UEB Gesteco di Cividât, che e à viodût sfantâsi il sium di vinci la sô prime Cope Italie de serie A2 di bale tal zei. Daspò di vê vuadagnât la finâl cuntune vitorie largje cuintri la scuadre di Rimini doi dîs prime, domenie di sere a Bologne e à cedût cuintri la Acqua S. Bernardo Cantù, che in semifinâl e veve eliminât – fasint cetante fadie – la Apu Old Wild West di Udin. La stagjon straordenarie de societât, nassude dome cinc agns indaûr, si ferme par cumò cu la tierce finâl pierdude de scuadre alenade di Pillastrini dopo chês de Cope Italie e de Supercope di Serie B. Uniche sodisfazion: ancje se tal PalaDozza di Bologne, cuntune maiute cui colôrs de bandiere taliane tal puest di chei dal Friûl, e à pierdût par 74-57, un so zuiadôr, Giacomo Dell’Agnello, al è stât premiât tant che rivelazion dal torneu. (A.I.) – 17.03.2025
75
