Episodi preocupant chel sucedût vie pe gnot tra miercus ai 10 e joibe ai 11 di Zenâr li dal Pront socors dal ospedâl Sante Marie de Misericordie di Udin, dulà che un imigrât pakistan al à agredît i sanitaris.
L’om, di 35 agns, al à dât in escandessencis e berlant plui voltis ‘Allahu Akbar’ (‘Diu al è grant’) cuntune aste puarte flebo al à prime menaçât il personâl infermieristic e dopo al à rot un crucifìs.
Pal personâl e i presints a son stâts moments di pôre, ma l’intervent svelt di une patulie dal nucli Radiomobile dai carabinîrs al à evitât che la situazion e deventi plui grivie. L’om, une volte imobilizât, no cence cualchi dificoltât de bande dai militârs, stant che il sogjet al jere agjitât, al è stât arestât e denunziât ae autoritât judiziarie.
Il pakistan al jere suspietât za di associazion cun fins teroristics e par lui al jere za un ordin di espulsion dal teritori talian. Il protagonist al sarà processât par diretissime. (a.d.g.) – 11.01.2024
