La Vuardie di finance di Triest e à scuviert cuarante incaricâts aes consegnis che in maniere formâl a jerin incuadrâts tant che fatorins (riders), ma a jerin in efiets lavoradôrs aes dipendencis di tantis ativitâts comerciâls.
I agjents, intal cors dai controi pal contrast ae evasion fiscâl e contributive e ancje al fenomen dal lavôr neri, a àn individuât 68 lavoradôrs iregolârs intant che a fasevin ativitâts professionâls in sîs impresis leadis ae ristorazion.
In particolâr, al è vignût fûr che cuarante riders, pûr metint petorinis e induments di aziendis cognossudis inte consegne a domicili, a jerin dipendents di chês ativitâts, in violazion clare de normative sul lavôr.
Dai 68 lavoradôrs in neri, doi a son risultâts percetôrs dal redit di citadinance. Al è saltat fûr che i paiaments di part dal personâl no regolarizât a vignivin fats in contants, e duncje cence lassâ nissun segn. Al tiermin des investigazions a son stadis mandadis fûr sanzions par plui di 240 mil euros. (A.D.G.) – 24.03.2023
