Screade vuê la gnove viabilitât tal centri di Udin cul slargjament de Ztl (Zone a trafic limitât) e de zone pedonâl. Pal moment li dai passaçs a son presints dome i agjents de Polizie locâl che a dan informazions e a controlin i permès. Plui indevant a saran invezit impiadis lis telecjamaris e a saran dadis lis multis a cui che nol rispiete lis gnovis regulis, cun multis fin a 89 euros par cui che al jentre cence vê il permès.
Il plan al previôt un piçul slargjament de zone pedonâl e un ben plui impuartant slargjament de Ztl che cumò e ten dentri: place XX Settembre, comprendude la part alte di vie Puscuel, vie Battisti, vie Stringher a çampe di vie Savorgnane, place Venerio a sud, vie Portanuova, vie Erasmo Valvason, place San Cristoforo, vicul Sillio, vie Caiselli, vie Palladio, plaçute Petracco (vie Petracco escludude), indulà che al sarà spostât il passaç, a nord. (a.d.g.) – 02.04.2024
