Nissune scualifiche dal cjamp, ma la Curve Nord sierade par doi turnis. Al è stât decidût de Cort sportive di apel, vuidade di Carmine Volpe, dopo il ricors presentât dal Udin cuintri la scualifiche dal cjamp, decidude dal judiç sportîf dopo lis insolencis di caratar raziâl al portîr dal Milan, Mike Magnan, sabide ai 20 di Zenâr. Cinc mil tifôs de Nord a staran duncje fûr par doi turnis, ma il “Stadio ‘Friuli’ / Bluenergy Stadium” al sarà viert a 20 mil tifôs sabide ai 3 di Fevrâr par Udinese-Monza. Al è stât duncje decidût di no penalizâ dut il public furlan, ma dome une part, chê là che a jerin presints i cinc tifôs acusâts des insolencis razistis al portîr dal Milan. Une decision che e à fat nassi cualchi ruze tra i tifôs blancs e neris. (A.I.) – 01.02.2024
115