Trafic internazionâl di machinis cun intestazion pustice scuviert de Vuardie di Finance di Gurize intai controi su la Rote Balcaniche, trafic gjestît di une bande criminâl tra Italie e Romanie. Dopo lis investigazions coordenadis de Procure di Prato, al è partît il secuestri, par un valôr di un milion di euros, di 135 autoveicui e di une aree di plui o mancul 5.000 metris cuadris in Toscane che e jere stade assegnade tant che discjarie abusive par refudums speciâi e pericolôs, che e faseve ancje di magazen pes autos, di là di 12 mil euros tra contants e assegns scuindûts intes abitazions dai indagâts, un om resident a Prato e trê compliçs, doi talians e un rumen. I reâts ipotizâts a son chei di imbroi ingriviât ai dams al Stât, sotrazion fraudolente al paiament di impuestis e falsetât ideologjiche.
La investigazion, nassude dal control di un camion cun targhe rumene, imatricolât sedi in Italie sedi in Romanie, al à puartât ae lûs un parc auto cun plui di 600 machinis dutis intestadis a un citadin talian resident a Prato cun tancj precedents penâi. Ducj i mieçs a jerin stâts cuistâts dal indagât cu la pratiche improibide de “mini volture”, mitûts in sospension di tasse di possès (il bol auto) in spiete di jessi rivendûts, ma concedûts in ûs a tancj sogjets, cuasi ducj cun precedents penâi o clandestins. L’indagât si jere intestât in maniere pustice e al mantignive in maniere simulade la proprietât di centenârs di veicui, ma di fat ju espuartave o ju cedeve a nauli, operant in neri. I siei trê compliçs a gjestivin invezit un dipuesit di veicui, di fat assegnât tant che discjarie abusive par refudums “speciâi” e “pericolôs”, dulà che a jerin tignudis 95 autoveturis (une robade), 3 rimorchis e 6 motociclis. Intun altri dipuesit a son stâts cjatâts altris 31 veicui. I incuirents a àn notificât ancje plui di 300 verbâi di contestazion pes violazions dal codiç de strade, par un totâl di sanzions aministrativis di plui o mancul 153 mil euros. (a.d.g.) -16.02.2024
