A son coventâts 16 agns, ma tal ultin Udin e torne inte massime serie di bale tal zei, la A1. Dopo une stagjon di insuazâ, passade simpri intai prins puescj, la Apu Old Wild West di Udin si è vuadagnade l’unic puest de promozion direte cun ben dôs zornadis di anticip, batint la scuadre di Rimini par 95-86. Une gare combatude pont su pont, cuintri un aversari che nol à mai molât e che al jere un di chei altris candidâts ae promozion: une partide “dal an” (o forsit ancje di plui), vinçude cun merit intun “Carnera” plen in ogni puest, cun centenârs di spetatôrs devant dal grant schermi sistemât fûr dal palaçut. Une fieste, ma ancje la fin trionfâl di une vere opare mestre sportive, cu la scuadre che e à dominât il campionât dal principi, cence pierdi mai dôs partidis une dopo di chê altre, tirade su’ cun agns di lavôr e passion. Soredut in graciis de vision dal president Alessandro Pedone, l’om che al à ricostruît il basket udinês des cinisis de Snaidero e dal vueit lassât intal 2009. Intune cui siei colaboradôrs e cul diretôr sportîf, al à fat une scuadre vincidore a ben planc, ma cheste volte la plui fuarte di dutis chês altris: il cjapitani Alibegovic, Hickey, Johnson, Da Ros, Ikangi e ducj chei altris, vuidâts di un alenadôr che nol à falât nuie. E che propit il dì de promozion al faseve ancje i agns: 44. Doplis auguris a lui e ancje a ducj i tifôs blancs e neris!
49
