Condanât a doi agns e cuatri mês pre Ioan Marginean Cocis ae fin dal procès pal omicidi colpôs de piçule Penelope, la frutine di 7 agns muarte cinc agns indaûr par cause de colade de pile de aghe sante inte glesie di Santa Chiara. Il judiç Daniele Faleschini al à invezit diliberât Anna Maria Zilli, la dirigjente dal istitût Uccellis indulà che si cjate la gleseute.
La tragjedie e jere sucedude intal dopomisdì dai 29 di Novembar dal 2019. Prime di lâ vie de gleseute, la frute si jere picjade ae pile de aghe sante daspò che si jere slontanade dal grup di fruts che si cjatavin in chel lûc. Par cause dal so pês, a pene 27 chilos, e veve molât la malte che dal 1664 e tignive dongje la pile che e jere colade intor e che le veve copade. (a.d.g.) – 05.12.2024
