A Cjassà un altri omaç a Garzoni

La musiche dal mestri Luigi Garzoni e je protagoniste di une gnove tape dal percors di valorizazion de opare e de vite artistiche dal “Cjantôr dal Friûl” promovût dal Comun di Cjassà. Sabide ai 15, la Glesie Parochiâl di S. Zuan Batiste e ospitarà “Cjantàit: omaç a Luigi Garzoni”, un conciert inmaneât in colaborazion cu la USCI dal F-Vj (Union Societât Corâls dal Friûl-Vignesie Julie) che al viodarà impegnâts I Cjantôrs dal Friûl di L. Garzoni e A. Zardini (diretôr Francesco Zorzini), la Corâl Zahre di Sauris (diretôr Mario De Colle) e il Grup corâl folcloristic Sot la nape di Vile di Cjargne (diretôr Stefano Romano). Il conciert al è dentri intes ativitâts dal progjet  “Luigi Garzoni: l’om, l’artist, l’inteletuâl”, promovût dal Comun di Cjassà cu la poie dal Ministeri de Culture, de Regjon, dal ARLEF, de Fondazion Friuli, de Comunitât Culinâr. (A.I.) – 13.03.2025