A “Contatto” siet gnovis produzions furlanis

E je stade presentade la gnove “stagjon lungje un an” di Teatro Contatto, ideade dal CSS, Teatri stabil di inovazion dal F-Vj, dute dedicade ae inovazion dai lengaçs artistics e ae sene contemporanie internazionâl. “In Real Life”, il titul de edizion numar 42-43 de rassegne, e torne a puartâ i spetatôrs ae vite reâl, al spazi di comunitât, di citadinance, al concet di public plurâl e democratic. In dut a saran 23 spetacui, cun siet gnovis produzions e coproduzions dal CSS, intai teatris Palamostre e S. Zorç di Udin. La stagjon presentade di Rita Maffei, presidente dal CSS, e de vice presidente Fabrizia Maggi inte sede de Fondazione Friuli, e scree ai 5 di Otubar li dal Palamostre cuntune des compagniis plui origjinâls de sene contemporanie, Dewey Dell. Tantis lis novitâts, cun nons famôs de culture taliane (Davide Enia, Elio Germano, Emma Dante, Antonio Latella, Catarina Guzzanti…) e dal teatri european. Tantis ancje lis produzions furlanis, de gnove version di Rita Maffei de “Maratone di New York” voltade par furlan di Paolo Patui, cui atôrs zovins Daniele Fior e Marco Rogante, dongje dal gnûf lavôr de regjiste udinese Martina Badiluzzi, il Pasolini daûr di Teho Teardo e cetant altri. (A.I.) – 02.09.2024