A Maravee chest an la art e je un circ

Ideât tal 2002 di Sabrina Zannier par puartâ la art contemporanie a un public simpri plui larc, mostrant dissiplinis artistichis diferentis e argoments condividûts di ducj, il festival “Maravee” al à tirât dentri vie pai agns cuasi cuatricent artiscj, progjetiscj, stiliscj, atôrs, regjiscj, danzadôrs e musiciscj, ancje di innomine mondiâl, in vincj lûcs diferents de regjon. Deventât “Maravee Circus” di cualchi an, il festival al è tornât cuntune edizion speciâl incentrade su la figure e su la metafore dal acrobat, cui che al sta intun ecuilibri precari, ma cence mai colâ. La rassegne si è vierte tal Museu de ex Centrâl idroeletriche “Pitter” di Malnîs, e je lade indevant tal Cjistiel di Susans e joibe ai 11 di Lui e sarà tal parc dal cjistiel di Glemone, cul spetacul itinerant “Circus Park”. Par sierâ, ai 18 di Lui, Claudia Contin Arlecchino tal Cjistiel di Colorêt cul spetacul “Acrobazie dell’anima”. (A.I.) – 10.07.2024