A Percût al è dut pront pal concors

Une edizion daûr chê altre, al à savût concuistâ simpri plui credibilitât e lustri, no dome a nivel regjonâl, ma ben di là dai confins dal Friûl-Vignesie Julie e de Italie. “Percoto Canta”, il concors cjantarin che chest an al celebre 37 agns di cariere, jentrant a fâ part de rêt dai festivai talians, al publiche il bant par partecipâ ae edizion che e ven. E al anunzie ancje il prin grant non clamât a jessi a cjâf de jurie di cualitât dilunc di dut il percors che al acompagnarà i cjantants bande la finâl, in program a Setembar, come simpri tal Teatri gnûf “Giovanni da Udine”. Il non al è di fat chel de cjantautore, diretore di orchestre e polistrumentiste Andrea Mirò, che e vuidarà la jurie che a selezionarà i concorints fint ae serade finâl, che e assegnarà il prin premi di 10 mil euros. (A.I.) – 17.04.2024