A Tavagnà doi teatris e une stagjon par ducj

“Il teatri di ducj”: a son lis peraulis di ordin de Fondazion “Luigi Bon” par une stagjon teatrâl che si fasarà in dôs salis intal Comun di Tavagnà, il Teatri “Luigi Bon” a Culugne e il gnûf “Paolo Maurensig” di Felet, une struture uniche in regjon, cuntune dotazion tecnologjiche audio e video imersive, sedi inte sale principâl che intal foyer. Un teatri cun grandis potenzialitâts, che al ospitarà la sô prime vere stagjon: un calendari eterogjeni cun passe trente avigniments intes dôs salis, de musiche classiche al jazz, de moderne ae liriche, de danze al teatri. A lavorâ intun pal program, in sinergjie cu la Fondazion Bon, l’Ert, la FVG Orchestra, Arearea, RiMe MuTe, Teatri Stabil Furlan e il “Verdi” di Triest. Joibe ai 17 la scree e la intitulazion uficiâl dal Teatri Comunâl di Tavagnà al scritôr Paolo Maurensig, a trê agns de muart, cuntun spetacul che al viodarà sul palc Martina Delpiccolo, Federico Guglielmo e la sinfoniche regjonâl direte di Giancarlo De Lorenzo. (A.I.) – 09.10.2024