A teatri il riviel de “crudel joibe grasse”

Al è un toc di storie dal Friûl che no ducj a cognossin: il riviel popolâr plui grant e plui tragjic dal Rinassiment talian, passât ae storie tant che “la crudêl zobia grassa”. Ven a stâi, lis violencis de Joibe grasse dal 1511 che, tacant de citât di Udin, si son slargjadis a dut il Friûl cun maçalizis e sacs ai dams de nobiltât locâl, za dividude in dôs fazions in lote. Une part e steve cui venezians, i Zambarlans, vuidâts di Antonio Savorgnan, une part cui Asburcs, i Strumîrs de famee Della Torre e di dute la nobiltât solidarie, tal timp de calade in Friûl di Massimilian di Austrie. Fat cu la regjie di Ferruccio Merisi, un grup di grancj atôrs e une corâl di vot elements pes musichis origjinâls di Marco Maiero, “Strumîrs e Zambarlans” e je la gnove impuartante produzion dai Teatri Stabil Furlan e il spetacul di ponte di cheste stagjon, in colaborazion cul Teatri gnûf “Giovanni da Udine”. La prime assolude vinars ai 22 di Novembar. (A.I.) – 21.11.2024