A teatri la storie di un agjent copât de mafie

La storie di un om dal nestri teritori che al à pierdût la vite in un dai atentâts plui teribii che il nestri Paîs al vedi vût par man de mafie e sarà contade a teatri. “Angeli custodi” di Riccardo Irrera e Francesco Gusmitta, diret e interpretât di Francesco Gusmitta, cu lis musichis origjinâls di Marco Vannozzi, al debute miercus ai 26 cun jentrade libare tal Teatri “Ristori” di Cividât. Il spetacul al sarà proponût inte stesse matinade aes scuelis citadinis che a àn aderît e po dopo, ai 27 e ai 28 di Fevrâr, tal Auditorium de Culture furlane di Gurize. A volê il progjet al è stât Lorenzo Tamaro, segretari regjonâl dal Sindicât Autonom di Polizie, tant che une dediche al coleghe Eddie Walter Cosina. L’incuintri cun Walter Mramor, diretôr di ArtistiAssociati, e l’atôr triestin Francesco Gusmitta al à permetût la nassite di un spetacul che al ponte viers chei che no si nomenin mai, chei che ur disin “numars doi”, i agjents di polizie che a son stâts cognossûts dome dopo la lôr muart. (A.I.) – 25.02.2025