A Triest il festival dal cine de Europe centri orientâl

Il prin apontament cul cine no dome talian, ma internazionâl, si davuelç di 36 agns a Triest. Dai 16 ai 24 di Zenâr al torne il “Trieste Film Festival”, il prin e il plui impuartant apontament cu lis produzions de Europe centri orientâl: un osservatori par scandaiâ autôrs e cines dispès pôc cognossûts chi di noaltris, inmaneât za prime de storiche colade dal mûr di Berlin. Chest an a vierzi la manifestazion al sarà un toc di Friûl: joibe ai 16 di Zenâr tal teatri “Miela” si viodarà “Wishing on a star” di Peter Kerekes, pe prime volte daspò de ‘prime’ mondiâl te Bienâl di Vignesie. Zirât di un innomenât regjist slovac e ongjarês che al à presentât ducj i siei cines a Triest, e je la storie di une strolighe napoletane che e je a stâ (pardabon!) a Dael, zirade achì e prodote de furlane Videomante di Erica Barbiani. Daspò de scree uficiâl tal “Rossetti”, e rivarà une schirie di proiezions, cuntune sezion dute dedicade aes regjistis feminis dal cine serp. (A.I.) – 14.01.2025