A Udin e Pordenon il cine di Tommaso Romanelli sul pari

Dopo vê vinçût la sezion “Panorama Italia” di “Alice nelle città” ae Fieste dal Cine di Rome, “No More Trouble – Cosa resta di una tempesta” di Tommaso Romanelli al rive in anteprime a Pordenon e a Udin. Il zovin regjist udinês al conte la storie dal pari, sparît in mâr ai 3 di Avrîl dal 1998, cuant che lui al jere un frutin, dilunc di une traviersade atlantiche cul ecuipaç di Giovanni Soldini, fate cun Fila, la ‘barcje dal avignî’. A saran i stes Romanelli e Soldini a presentâ il cine martars ai 12 al public di Cinemazero (prime de proiezion des 8.45 sot sere) e dal Visionari (ae fin di chê des 8.45). Di joibe ai 14, il cine al larà fûr in dutis lis salis talianis. (A.I.) – 11.11.2024