A Udin la musiche di Bach lade ancje intal spazi

Pôcs grups tal mont a puedin svantâ il sucès e la innomine di Europa Cortese, la orchestre nassude intal 1990 de passion e de curiositât culturâl e musicâl dal so diretôr, Fabio Biondi. La sô storie e je aromai grandonone: incisions discografichis, concierts intes salis plui prestigjosis e une presince costante intai festivai internazionâi a son la testemoneance di une cualitât ecelse di sun e di interpretazion. Il program de serade tal Teatri gnûf “Giovanni da Udine”, miercus ai 5, al sarà dut dedicât ai sîs concierts Brandeburghês, la opare mestre strumentâl di Bach, componude intal 1721. Di alore, chestis partiduris a àn passât il timp consegnant a chei che a vignaran i esemplis plui lustris de musiche baroche. E a àn passât ancje il spazi, stant che une regjistrazion dai Concierts Brandeburghês e je di fat ancjemò in viaç su la Voyager, la sonde lançade intal 1977 par esplorâ il spazi plui profont ae ricercje di segnâi di vite. (A.I.) – 04.03.2025