75
La propueste musicâl dal Teatri gnûf “Giovanni da Udine” e va indevant sabide ai 17 cuntun gnûf apontament di sugjestion particolâr. Al è di fat il prin conciert in citât di une orchestre dute al feminin, la Female Symphonic Orchestra Austria, direte de taliane Silvia Spinnato, cu la partecipazion speciâl dal sopran Fiorenza Cedolins. La formazion di Salisburc e à fra i siei obietîfs la valorizazion dal repertori sinfonic di compositoris dal periodi classic e romantic ancjemò pôc cognossudis al grant public. La prime part dal program e sarà incentrade su la produzion musicâl di une artiste rivoluzionarie intal mont de musiche classiche, ma ancjemò discognossude, Amy Marcy Cheney Beach. (A.I.) – 16.02.2024
