Ae ricercje de plui grande di dutis: la Duse

Miercus ai 26 aes 7 sot sere tal Visionario di Udin e aes 20.45 sot sere li dal Cinemazero di Pordenon, la regjiste e atore Sonia Bergamasco e presentarà il so documentari “Duse, The Greatest”. A cent agns de muart di Eleonora Duse, Sonia Bergamasco e acompagne il public intune vere investigazion su la atore che e à cambiât il mistîr dal atôr par simpri, ispirant gjenerazions di atoris. Definide di Charlie Chaplin “la plui grande che si sedi mai viodude”, nomenade di plui di cualchidun “la miôr atore di ducj i timps”, amade di Marilyn Monroe e di Anna Magnani, la “Divine” e je lade di là dal mît ancje se di jê a restin dome che un cine mut e cualchi foto e ritrat. (A.I.) – 25.02.2025