Al cine par dâ un contribût aes vitimis de aluvion

La memorie de esondazion dal flum Po intal ’51 e il jutori concret ae popolazion emiliane e romagnole colpide de aluvion in dì di vuê. Di joibe al prin di Jugn fint a miercus ai 7, a Cinemazero di Pordenon e al Visionario di Udin, la proiezion dal documentari “Po” di Andrea Segre e Gian Antonio Stella e je dedicade a cui che, in chescj dîs, al à pierdût dut e al à di cjatâ il mût di ripartî. Lâ a viodi un cine che al conte une tragjedie dal passât, ancjemò presinte inte memorie di cui che le à vivude, al devente un piçul e grant segnâl di solidarietât, che ognidun al pues fâ. Il rigjâf des proiezions in program a Pordenon e a Udin, di fat, al vignarà destinât aes comunitâts aluvionadis traviers il cont corint ativât de Regjon Emilie-Romagne. “Po” al è stât presentât in anteprime ae decime seste edizion dal “Pordenone Docs Fest – Le voci del documentario” un an indaûr. (A.I.) – 01.06.2023