Li dal Palamostre e torne une opare mai replicade dal 2010

Miercus ai 18 di Otubar, sot sere, tal Teatri Palamostre di Udin e sarà rapresentade la opare di Carlo Tolazzi e Davide Pitis “Qui tollis peccata mundi”. Il Centri interdipartimentâl pal svilup de lenghe e de culture dal Friûl (Cirf) dal Ateneu furlan, in colaborazion cu la Associazion Filarmoniche dal Friûl-Vignesie Julie, al à volût tornâ a puartâ in sene cheste opare rapresentade pe prime volte tal 2010 e mai plui replicade. La forme dramatiche dal melolic, dal titul “Qui tollis peccata mundi”, e previôt une vôs recitante (di un atôr), un côr, cualchi strumentist e un diretôr di orchestre par un totâl di 21 personis che a partecipin ae metude in sene de opare. La vôs recitante di Maurizio Fanin e sarà compagnade dal Ensemble de Filarmoniche dal Friûl-Vignesie Julie e dal Côr “G. Pressacco” de Universitât dal Friûl, sot la direzion dal mestri Davide Pitis che al è ancje autôr des musichis. (A.I.) – 17.10.2023