Inte serade dai 25 di Avost al tacarà a Gurize il 50n Festival mondiâl dal Folclôr. Il prin event si tignarà in place Cesare Battisti aes 8 e mieze di sere cul conciert di viertidure de bande dal grup FreeVoices. Dopo al sarà il salût des autoritâts e l’impiament dal tripot tradizionâl de amicizie.
Daspò il Folclôr al animarà ogni dopomisdì il centri citât cun piçulis anteprimis dai grups folcloristics presints a Gurize. Sabide il 46n Congrès su lis tradizions popolârs, ospitât inte sale Dora Bassi di vie Garibaldi, al varà teme “Il rûl dal Festival pe cognossince dal patrimoni culturâl imateriâl”. Domenie ai 28 di Avost aes 10 a buinore inte place Transalpine i Sbandieradôrs di San Gemini si esibiran sul plaçâl cu lis bandieris europeanis adun cu la bande di Nova Gorica. Aes 5 e mieze sot sere, la 55e Parade internazionâl dal Parc dal Ricuart. (A.D.G.) – 09.08.2022
