Al torne il musicâl su S. Francesc

Un spetacul che al fasarà cjantâ e balâ di sigûr dut il public inte stagjon dal ‘Verdi’ di Gurize. Joibe ai 30 e je in program la uniche tape in regjon di “Forza venite gente”: la storie di S. Francesc, patron di Italie, contade di 17 artiscj tra cjantants e balarins. Ai 9 di Otubar dal 1981, al Teatri Unione di Viterbo, e à debutât une comedie musicâl che in pôcs agns e sarès deventade pardabon un spetacul di cult, voltât in svariadis lenghis, cun 3.500 replichis e passe 2,5 milions di spetatôrs. Daspò cuarante agns, la Soni Produzioni e à decidût di proponi il spetacul intune version fedêl a chê origjinâl, ma rinovade insot inte tecnologjie e inte cualitât de preparazion. (A.I.) – 28.03.2023