Al torne il teatri che al fevele des feminis

Sabide ai 30 e torne a tacâ la decime novesime edizion de rassegne “La scena delle donne”, direte di Bruna Braidotti, inmaneade de Compagnia di Arti&Mestieri. Dopo la polse estive, la compagnie e va indevant cu la sô ativitât di promozion de sensibilitât des feminis, ufrint al teritori la oportunitât di aprofondî i temis, la storie e lis problematichis socioculturâls traviers la sene. In spiete de sezion autunâl 2023, che e scomençarà ai 27 di Otubar, al va in sene la danze cun “Plenir – La cesta” de coreografe slovene Daša Grgič, une produzion Balkan dance project che e instrece moviment, vôs e musiche, intal Claustri de Biblioteche Civiche di Pordenon. (A.I.) – 28.09.2023