Al “Verdi” di Istât si tache cuntun omaç a Dalla

Finide la programazion de stagjon in sale, al tache martars ai 25 il cartelon estîf dal Teatri “Verdi” di Pordenon, di sene fint ai prins di Setembar inte Arene “Verdi”, in plaçute Pescheria. Un calendari siôr tra concierts cul miôr jazz contemporani, trê spetacui teatrâi e musicâi e cuatri concierts de “Music Nights”, cui miôr zovins talents musicâi internazionâi. L’inviament al è cu la rassegne “Open Jazz”, firmade ancje chest an di Francesco Bearzatti, che al propon cuatri concierts in trê diviersis seradis: no dome che il grant jazz talian e internazionâl, ma ancje cetant spazi a chel furlan. A vierzi il cartelon il conciert “Lucio dove vai” (Luci dulà vâstu), il gnûf lavôr de cjantante Costanza Alegiani in omaç al grant cjantautôr Lucio Dalla, che si concentre su la prime part de cariere dal artist bolognês, cuant che al lavorave cul poete Roberto Roversi. (A.I.) – 24.06.2024