Ancje tal Visionario al rive il cine sloven

Te suaze di GO!2025, a rivin ancje tal Visionario di Udin cuatri titui de retrospetive “Orient Vzhod/Ocident Zahod – Border Cinema”, curade di Kinoatelje. Une voglade artistiche e storiche sul cine sloven che, tra varis stîi e varis gjenars, si vierzarà joibe ai 20 cun “Alpeadria Underground!” di Matevž Jerman & Jurij Meden, un documentari che al cjape dentri curtmetraçs zirâts dilunc dal periodi dal socialisim e che si puedin viodi pe prime volte dopo decenis. Si larà indevant joibe ai 27 di Fevrâr cu la comedie dai ecuivocs “Questa è una rapina!” di Gregor Andolšek, ai 6 di Març “Lunatic” di Igor Sterk e ai 13 “Cent’anni” di Maja Prelog. (A.I.) – 19.02.2025