Ancje l’udinês Battiston tal documentari su Mazzacurati

Intal Zenâr dal 2014 al murive Carlo Mazzacurati, il regjist di un cine elegant cuntune poetiche particolâr par profonditât creative e varietât di gjenar, de comedie al ‘noir’. Traviers i siei cines, Mazzacurati al è rivât a creâ monts margjinâi, provinciis abitadis di int che si cjate ator ogni dì. A dîs agns di distance, il documentari “Carlo Mazzacurati. Una certa idea di cinema” al conte chel percors. Miercus ai 5 al sarà presentât tal Cinemazero di Pordenon e li dal Visionario di Udin in presince dal regjist Enzo Monteleone e dai atôrs Roberto Citran e l’udinês Giuseppe Battiston. (A.I.) – 04.03.2025