Anzovino al presente il so gnûf album al Visionario

Vinars ai 19, aes 7.30 di sere, si ferme al Visionario di Udin il zîr di presentazion di “Don’t forget to fly”, il gnûf album di Remo Anzovino, dut sunât di bessôl al piano, pe prime volte inte sô cariere. Il lavôr dal famôs compositôr pordenonês al è un viaç tra lis mil pussibilitâts espressivis e stilistichis dal piano, une esplorazion oniriche dal svol, une metafore che e tradûs in sun la dibisugne dai oms di svolâ. Il sest album di studi, jessût in vinîl, Cd e su lis plateformis digjitâls principâls, al sarà presentât ancje cun cualchi toc sunât dal vîf. (A.I.) – 18.05.2023

Foto di P. Grasso