Arlechin al torne par inventâ l’om gnûf

La rassegne e impromet “spetacui di no dismenteâ” dai 3 ai 10 di Setembar e si pues jessi sigûrs che al sarà cussì ancje chest an. La vincjesime otave edizion dal “Arlecchino errante”, inmaneade a Pordenon, e met in cjamp ancjemò une volte dute la sô fuarce e la sô libertât di espression, frontant une tematiche cetant contemporanie: “Re–inventare l’Umano”, tornâ a inventâ l’om, cjapant di une bande lis influencis simpri plui gruessis de tecnologjie e de realtât virtuâl tes nestris vitis. E di chê altre, dant un cuc ai segnâi di mutazion che a rivin di altris bandis. Il risultât al è un progjet pensât ancje par tirâ dongje il public plui zovin, puartant in dute la citât spetacui di strade, laboratoris e conferencis, intun grant cartelon là che si cjatin mims de Ucraine, conciert spetacul di sienziâts punk, circ, incjant, poesie e cetant altri, coordenât dal diretôr artistic Ferruccio Merisi, che al à sielt cuasi dome ‘primis’ in regjon par judâ il public a cjatâ fûr alc di gnûf e di diferent pe vite di vuê. (A.I.) – 03.09.2024