Arti e Mestieri: ve chi i saçs de fin dal an

L’an academic si siere ancje pe scuele di teatri de Compagnia di Arti e Mestieri di Pordenon, che chest an e à viodût cressi une vore il numar dai partecipants: 93, cuntune atenzion particolâr ai fruts. Martars ai 13 di Jugn e miercus ai 14, la Compagnie e presente al public i saçs conclusîfs dai cors anuâi, cun spetacui che a viodaran i tancj arlêfs, di chei plui piçui a chei plui grancj e esperts. Dal 2000 la Compagnie si dediche ae formazion teatrâl, sedi intes scuelis dal teritori che inte proprie sede, cun cors par ducj: par cui che al vûl dedicâsi ae cariere artistiche e par cui che al vûl dome miorâ la sô espressivitât e capacitât comunicative. (A.I.) – 12.06.2023