Atôrs zovins di Milan a contin la Duse a Cordenons

Sabide ai 25 la vincjesime edizion de rassegne “La scena delle donne” (La sene des feminis), direte di Bruna Braidotti, inmaneade de Compagnie di Arti&Mestieri e fate cu la poie de Regjon e de Fondazione Friuli, e fâs tape a Cordenons tal Auditorium “Aldo Moro”. In sene “In viaggio con la Duse” (In viaç cu la Duse), un spetacul cu la regjie di Massimo Navone, prodot di Bonawentura / Teatri Miela e de Scuele civiche di Teatri “Paolo Grassi” di Milan. Il spetacul al è une creazion coletive di e cun atôrs zovins de scuele, che dal 2023 si son concentrâts sul mît di Eleonora Duse, artiste e femine che e à anticipât un ciert mût di recitâ. (A.I.) – 24.05.2024