Audiobus, in viaç ae scuvierte di Gurize viodude dai fruts

A saran cinc lis corsis suntun autobus straordenari. Un viaç ae scuvierte di une Gurize scuindude in graciis di Audiobus, un progjet prodot di Zeroidee APS, scrit di Giovanni Chiarot e Renato Rinaldi. Audiobus al è un viaç suntun autobus urban, sul ôr tra reâl e sureâl. Ae partence, ogni viazadôr al à un pâr di scufis e une vôs che e conte la vuide ae scuvierte di une citât divierse: chê viodude dai voi des frutis e dai fruts de scuele elementâr Rismondo di Gurize, che intes setemanis passadis a son stâts tirâts dentri intun laboratori: cui voi vierts a àn scuviert dutis chês robis segretis, scuindudis, cuasi invisibilis. Lis lôr peraulis/ideis/visions a son jentradis inte trame de conte, che e sarà pussibil scoltâ in scufe sabide ai 25, de matine, cun partencis in program dal Centri Intermodâl Passizîrs de stazion di Gurize. (A.I.) – 23.02.2023