“Blessound”, i concierts de fin dal Istât a Blessan

A Blessan di Basilian, il mês di Avost si siere cun “Blessound”, une rassegne de fin di Istât cun musiche ‘indipendente’ e di mangjâ e di bevi, dut a bon presit. Inmaneât di passe dîs agns de Pro Loco Pro di Blessan e dai Danzerini Udinesi cu la direzion artistiche di Michele Poletto, al è aromai un apontament cetant spietât, cun propuestis diferentis che a tornin a puartâ achì cualchi artist che al è fûr dai zîrs impuartants, o ben che a fasin cognossi al public cualchi non gnûf che po dopo al deventarà protagonist de sene taliane. Vinars ai 30 si tache cun trê propuestis: prime Kalpa, ven a stâi il triestin Angelo Mallardo, za passât par X-Factor. Po dopo Massimo Silverio, autôr di çurçuvint che al cjante intune lenghe dute sô e che al à fat un album, “Hrudja”, sielt tra i miôrs dal an passât in Italie. A sierâ i Queen Of Saba, une cubie eletroniche ma cuntune anime analogjiche, fate di Sara Santi e Lorenzo Battistel. Ancje sabide ai 31 i concierts in program a son trê: si tache cun doi zovins, il rapper Sebaa di Udine e Lamante dal Venit, po dopo Cristina Donà, une des vôs preseadis de sene taliane za dai prins agns Nonante, compagnade di Saverio Lanza. Al prin di Setembar si siere cun Foresta, cjantautore mieze taliane e mieze brasiliane, che e à fat vignî fûr une grampe di tocs soul, r&b e bossa nova, e po dopo Michele Poletto, sedi in version Dj che cjantant, cuntun grup di musiciscj innomenâts. (A.I.) – 29.08.2024