Calexico, al rive il rock dal desert

Il festival “Folkest”, dopo vê cjapât dentri cuasi une trentine di comuns, al rive tal Cjistiel di Udin ospitant i Calexico, la band americane di “alternative country” fondade in Arizona e deventade famose pes sôs tantis influencis: folk, country, tex-mex, blues, cjançon di autôr… Il grup, che al à publicât vot album in studi, al à passât une buine part dai ultins trente agns esplorant confins musicâi polvarôs dal Sud-Ovest de Americhe e creant cjançons singolârs, cinematografichis, misteriosis e grandiosis, compagnis dai paisaçs desertics che lis àn ispiradis. Une musiche disconfinade e romantiche, cul voli bande l’orizont in cercje de aventure che e vegnarà. (A.I.) – 16.07.2024