“Cene cun delit”: il teatri tal ristorant

Di agnorums, il grup di Anà-Thema Teatro al à usât il public a une schirie di spetacui che no si davuelzin simpri là che a varessin, ven a stai sul palc di un teatri. Ancje se la stagjon curade li dal Teatri di Osôf e va indevant, la compagnie e je tornade a tirâ fûr une sorte di spetacul une vore preseât prime dal Covid: la “Cene cun delit”. E je une rapresentazion teatrâl metude dongje di une cene speciâl, par solit intun ristorant (ma a son stadis fatis ancje cenis ‘cun delit’ in cjistiel, in place…). Il public, vuidât dal comissari Agostino Matranga (l’atôr e regjist Luca Ferri) al è dividût in scuadris investigativis, une par taule, e di un plat a chel altri al viôt cualchi sene ‘in zâl’ che si siere cuntun sassinament. Di chi il public al devente ancje protagonist dal spetacul, stant che i ven domandât di cirî di risolvi il misteri doprant indizis, fotografiis, interogatoris… Dutis lis cenis a son une diferente di chê altre e la compagnie e pronte alc di gnûf par ogni ocasion: chês che a vegnin a saran li dal ristorant “Astoria Italia” di Udin, vinars ai 17 di Zenâr e ai 21 di Fevrâr. (A.I.) – 15.01.2025