Cent agns pal “Tomadini” cuntune fieste

Al celebre il travuart dai cent agns il Conservatori statâl di musiche “Jacopo Tomadini” di Udin, che al à lis sôs lidrîs inte Scuele publiche di musiche intitulade intal 1922 al musicist furlan pre Jacopo Tomadini (Cividât, 1820-1883), e che dal 1925 al è deventât Istituzion di alte formazion musicâl. “Un travuart impuartant e prestigjôs pal Conservatori e pe citât che di simpri lu ospite – al osserve il president dal “Tomadini”, Guglielmo Pelizzo –. Par chest o vin decidût di vierzi lis puartis al gnûf an academic 2024/2025 e di celebrâ i cent agns cuntun avigniment che e sarà une fieste vierte a dute la citât”. Apontament miercus ai 26 aes 6.30 di dopomisdì tal Teatri gnûf “Giovanni da Udine”, dulà che il public al sarà ad in plen dentri dal avigniment. Vie pe serade al vignarà inzornât sui progrès costants di une istituzion musicâl che e je un riferiment pai musiciscj furlans zovins, cun 450 students, 86 docents e 50 cors. Sul palc a laran une setantine di musiciscj de Orchestre Sinfoniche dal Tomadini, direte di Carlo Emilio Tortarolo, cun trê zovins soliscj. La jentrade e je sore nuie, daspò di vê cjapât i biliets a gratis li de Bilietarie dal Teatri di vie Trent, ogni dopomisdì des 4 aes 7. (A.I.) – 24.02.2025