Centazzo a Felet cul spetacul dedicât a Marco Polo

Al à tacât di lontan, ai 5 di Setembar: di Sydney, in Australie. Po dopo, al è lât a sunâ ator pal mont, come simpri, là che al è stât une vore preseât: in Indie, in Gjapon… Andrea Centazzo, nassût a Udin, baterist innomenât prime tal mont de improvisazion jazz e po dopo percussionist, compositôr e creatôr di spetacui multimediâi al è un dai fîs plui impuartants dal Friûl, cun ducj i premis che al à cjapât vie pe cariere e i centenârs di discs fats. Il so ultin spetacul “Imaginary Traveler”, viazadôr imagjinari, al è dedicât al marcjadant e grant viazadôr Marco Polo, che di Vignesie al le fint in Cine e che al murì 700 agns indaûr. Un aniversari che Centazzo, ben usât a messedâ musichis e imagjinis di puescj e Paîs diferents e lontans (soredut tal Orient lontan), nol podeve dismenteâ. Joibe ai 5 di Dicembar, il spetacul (un “solo multimedia concert”) al sarà presentât in prime taliane propit in Friûl, tal gnûf teatri multimediâl “Paolo Maurensig” di Felet, par cure di Simularte e il comun di Tavagnà e cu la colaborazion di Euritmica. (A.I.) – 04.12.2024