Cevoli, un comic a cent a la ore

Il comic romagnûl Paolo Cevoli al puarte tal TeatrOrsaria di Premariâs vinars ai 24 il so monolic “Andavo a cento all’ora” (O levi ai 100 a la ore), ospit de stagjon teatrâl promovude dal Comun e dal circuit dal ERT. Il titul al è compagn di chel dal prin singul di Gianni Morandi jessût intal 1962, cuant che lâ a cent a la ore e pareve une grande velocitât. Cevoli, nassût cuatri agns prime de jessude di chel toc e cumò nono di doi nevoduts, al imagjine di contâ ai fîs dai siei fîs cemût che e jere la vite cuant che lui al jere frut. La realtât che e ven fûr de sô narazion e je dificile di imagjinâ par un frut di vuê: nol jere internet, i telefons a vevin la rudiele, la television e jere in blanc e neri… (A.I.) – 23.01.2025