Cine mut a Cinemazero: si torne tal timp de Union Sovietiche

Secont apontament, martars ai 29 li di Cinemazero, cu lis “Seradis di Cine Mut”, la rassegne dedicade aes oparis mestris dal mut che a fasin cent agns, nassude in colaborazion cu lis Zornadis dal Cine Mut e la Cineteche dal Friûl. In program la proiezion dal cine “Il cineocchio” (Kinoglaz, 1924) di Dziga Vertov, il prin luncmetraç dal regjist rus che nol jere gjavât di materiâl di repertori, e che al rapresente la messe in pratiche des sôs ideis teorichis. Ven a stâi: dinei de senegjature, fiducie inte capacitât de machine di prese di cjapâ dentri la realtât e un grant spazi al montaç. Zirât a Odessa, Kiev e Mosche come che a fossin un sôl lûc, il cine al è une opare mestre de storie dal cine e al conte une zornade in Union Sovietiche. (A.I.) – 28.10.2024