Cine mut, a Pordenon il miôr festival tal mont

Ae fin di ogni an, studiôs e apassionâts di cine mut a son clamâts a racuelte di Silent London, il blog de innomenade gjornaliste britaniche Pamela Hutchinson, par decretâ il miôr festival tal mont in chest setôr. Il scandai relatîf al 2022, dopo vê metût adun un numar record di vôts, al à decretât ancjemò une volte che “Le Giornate del cinema muto” di Pordenon a son il miôr festival di cine mut dal an. Lis sodisfazions no si fermin chi. Altris doi ricognossiments di rilêf, che lis Zornadis a condividin cu la orchestre San Marco di Pordenon, a rivin pai avigniments speciâi di viertidure e di sierade. Il festival di Pordenon al è stât judicât fondamentâl ancje par un pâr di retrospetivis e di riscuviertis. (A.I.) – 26.01.2023