Cine mut cun orchestre a Gurize

Il cine mut al torne al Kulturni Dom di Gurize, martars ai 14 aes 8.30 di sere, cu la proiezion di “What happened to Jones?” (“Ce isal sucedût a Jones?”, dal 1926), cun acompagnament musicâl dal vîf de Zerorchestra. Ae sô jessude, il cine comic diret di William A. Seiter al è stât descrit tant che “une miniere di ridadis” e, par cualchidun, al jere un dai cines plui divertents mai viodûts a Broadway. Lis musichis a son componudis di Juri Dal Dan (piano e direzion) e l’ensemble al è formât di Mirko Cisilino (trombe e trombon), Luca Colussi (batarie), Luca Grizzo (percussions e efiets sonôrs), Didier Ortolan (clarinet), Gaspare Pasini (sax alt), Romano Todesco (liron) e Luigi Vitale (vibrafon). (A.I.) – 13.03.2023