Cinemazero, une gnove sale cui taulins

Tal “Cinemazero” di Pordenon e je stade screade la gnove SalaModotti, rinovade ad implen par fâle ancjemò plui moderne, comude e ospitâl. Une sale inovative, une tape fondamentâl di un grant progjet culturâl che al nas di une vision di lunc periodi che al cjale al cine dal avignî tant che a un lûc di culture, socialitât e incuintri. La gnove sale dedicade ae fotografe e atore udinese e à racuelt daurman il preseament di doi protagoniscj dal cine talian, il regjist Gianni Amelio e l’atôr Alessandro Borghi, che le àn viodude in anteprime. In dut, a son 38 puescj, cun 28 poltronis e 5 divanuts doplis, cun taulin, puarterobis e un parelum par vê une lûs difondude. (A.I.) – 16.09.2024