Conciert de Vierte cun sîs pianos

Sabide ai 22 il Teatri “Paolo Maurensig” di Tavagnà al ospite il “Conciert de Vierte” dal grup Hexagon, la conclusion de stagjon dai “concierts imersîfs” promovûts de associazion RiMe MuTe. Protagonist de serade al è l’ensemble di sîs pianos Piano Hexagon, formât di Ferdinando Mussutto, Matteo Di Bella, Ilaria Locatelli, Francesca Sperandeo, Matteo Andri e Carolina Pérez Tedesco, cu lis grafichis dal video artist Lorenzo Bosich. Il Conciert de Vierte al vûl celebrâ la spetacolaritât de espression musicâl, esaltade dal virtuosisim artistic dai artiscj tirâts dentri. Il program, intitulât “Dancing pianos”, al presente une varietât di composizions unidis dai ritmis de danze, dal Sietcent ae musiche di discoteche dai agns Setante dal secul passât. (A.I.) – 21.03.2025